Hum Log

Hum log
Daairon mein chaltay hain
Daairon mein chalnay se
Daairay to barhtay hain
Faaslay nahin ghat.tay
Aarzuain chalti hain
Jis taraf ko jaatay hain
Manzilain tamanna ki
Saath saath chalti hain
Gard urti rehti hai
Dard barhta rehta hai
Raastay nahin ghat.tay
Subah-dam* sitaaron ki tez jhilmilaahat ko
Raushni ki aamad ka pesh-baab* kehtay hain
Ik kiran jo milti hai, aaftaab* kehtay hain
Daaira badalnay ko inqilaab* kehtay hain

*Subah-dam = dawn; early morning
*Pesh-baab = preface (as in a book); something to hint or suggest what's about to come; foreshadower
*Aaftaab = sun
*Inqilaab = revolution ; complete change in the dynamics of something

(We (humans/people) have our set ways of doing things. We simply follow them and hope that somehow our problems will get resolved, our wishes will get fulfilled, but don't take any step towards these goals. Because we follow just one pattern, we keep going in circles, and keep increasing our journey towards unfulfilled desires (since there's no end point, the distance to travel is infinitely long). And then the smallest thing that happens out of the ordinary, we start to take that as a sign of positive change. For us, the biggest revolution is simply the change of direction (implying that's how ignorant we are when it comes to working towards something better). We don't even know how to take a positive step forward)

~Amjad Islam Amjad

Zahid ne - Abida Parveen (Raqs-e-bismil)

Us ka mukh ik jot hai ghoonghat hai sansaar
Ghoonghat mein vo chup gaya mukh per aanchal daar(daal)

(This might be pushing it, but this is my exegesis of the couplet. Her face is like light (guiding light) and the ghoonghat is the world -- symbolizing life and the struggle to find a place in the world. She hid herself in her veil and covered her face. Meaning the guiding light is lost/hidden in the world, and it's up to the lover to find it. How else will he reach his destination?!)

Zaahid ne mera hausla-e-eimaa.n nahin dekha
Rukh per teri zulfon ko pareeshaa.n nahin dekha

(The pious has not seen the strength of my faith, since he was not the one who saw your hair spread on your face. Implying if he saw what I saw, he would've lost all control. I didn't lose my control, hence proving the strength of my faith)

Her haal mein bus pesh-e-nazar hai vohi soorat
Main ne kabhi roo-e-shab-e-hijraa.n nahin dekha

(I can never experience a night without my beloved, because his/her face is always in my thoughts)

Aaye thay sabhi tarah ke jalvay meray aagay
Main ne magar aye deeda-e-hairaa.n nahin dekha

(There have been many wonderful sights that have come before my eyes, but I didn't see any of them. Implying my thoughts are fixated on a single face -- that of my beloved)

Kiya kiya hua hangaam-e-junoo.n yeh nahin maaloom
Kuch hosh jo aaya to gareebaa.n nahin dekha

(I don't know what chaos has taken place here. All I know is, when I came to my senses, my collar was torn. Implying I was so deep into my thoughts about my beloved that I didn't even realize when or how my collar got ripped)

~Asghar Gondvi

Musalsal Rokti Hoon

Musalsal rokti hoon us ko shehr-e-dil mein aanay se
Magar vo kohkan rukta nahin deevaar dhaanay se
kohkan = mountaineer, dhaana = to destroy

(I always try to stop him from entering my heart. I keep on building high barriers but he keeps on destroying them, implying he always finds a way to get to my heart)

Bhala kiya dukh ke aangan mein sulagti larkiyaan jaanain
Kaheen chuptay hain aansu aanchalon mein chupaanay se

(These innocent girls don't realize that tears can't be hidden, no matter how much you try to wipe them off with your 'aanchal')

Abhi to fasl taaza hai hamaaray harf-o-maani ki
Abhi dartay nahin hum mausamon ke aanay jaanay se

(Background: When crops are grown, weather plays a crucial role as to how much fruit will be reaped. But when the crop is at its full bloom, it can withstand the test of seasons.
The sher means that right now, my words are fresh, I've recently uttered them. I can stand by them because I have all my strength intact to protect them)

Abhi to ishq mein aankhain bujhi hain dil salaamat hai
Zameenain baanjh hoti hain kabhi faslain jalaanay se
Baanjh = barren; unable to produce

(Background: When farmers need to start growing a new crop but have limited land resources, they empty another field by burning that fruit's plants. But sometimes in doing so, the topsoil gets damaged and the land becomes barren.
The sher means that right now, although love has lit its fire inside of me, it hasn't damaged me. The only loss I've suffered is that I've cried too much. But I still have my spirit safe. This fire could've destroyed everything, just like when they burn crops, thay permanently damage the land and then nothing good can ever come out of it)

Mujhay tanha muhabbat ka yeh dariya paar karna hai
Nadaamat ho gee us ke hoslon ko aazmaanay se

(I have to find my own destiny in the journey of love. If I ask my 'mehboob' to join me, he'd refuse and I'd be ashamed of falling in love with a coward)

Humain kis zarf ke kirdaar kay qissay sunaata hai
Tujhay aye sheher hum bhi jaantay hain ik zamaanay se
zarf = capacity (to do good deeds, to be good), kirdaar = character

(Don't lecture me about the goodness of the inhabitants of this city. I've known them for quite some time. I have judged them and I know they're not as righteous as you're making them out to be)

Tujhay bhi zabt-e-gham ke shauq ne patthar bana daala
Tujhay aye dil bohat roka tha rasm-o-raah nibhaanay se
zabt = self control, rasm-o-raah = societal norms

(This is where the true psychologist in me shines out!
The poet is talking to herself here. She's angry at herself for fulfilling certain norms/responsibilities of relationships: friendship, love, being human, etc. When we try to repress out emotions and keep things bottled up, a stage comes where we feel numb. We almost become unable to feel anything at that point, hence the word 'patthar' (stone) is used as a metaphor - devoid of all emotions and sentiments. The head told the heart not to become too involved but her heart chose a different path than her head, rendering her incapable of feelings now. She got hurt very badly)

~Noshi Gilani

Yeh Jo Raig-e-Dasht-e-Firaaq Hai

Yeh jo raig-e-dasht-e-firaaq hai, yeh rukay agar
Yeh rukay agar to nishaa.n milay, yeh nishaa.n milay
Keh jo faaslon ki saleeb hai
Ye gari hui hai kahaan kahaan
Mere aasmaa.n se kidhar gayee tere iltefaat ki kehkashaan
Mere bekhabar, mere benishaa.n
Ye rukay agar to pata chalay
Main tha kis nagar, tu raha kahaan
Keh zaman-o-makaa.n ki vus'atain
Tujhay dekhnay ko taras gayeen
Vo meray naseeb ki barishain
Kisi aur chatt pe baras gayeen
Meray chaar soo hai vo gubhaar-e-jaa.n, vo fishaar-e-jaa.n
Keh khabar nahin meray haath ko meray haath ki
Mere khaab se teray baam tak
Teri rehguzar ka to zikr kia
Nahin zaufishaan tera naam tak
Hain dhuaan dhuaan meray usthakhvan
Meray aansuon mein bujhay huay meray ustakhvan
Meray naqsha gar, meray naqsha jaa.n

Isi raig-e-dasht-e-firaaq mein rahay muntazir teray muntazir
Meray khaab jin ke fishaar mein
Rahi meray haal se bekhabar
Teri rehguzar
Teri rehguzar ke jo naqsh hai meray haath per
Magar is bala ki hai teergi
Keh khabar nahin meray haath ko meray haath ki
Vo jo chashm-e-sho’bida saaz thi vo uthay agar
Mere ustakhvan mein ho raushni
Usi aik lamha-e-deed mein teri rehguzar
Meri teera jaa.n mein chamak uthay
Meray khaab say tere baam tak
Sabhi manzaron mein damak uthay
Usi aik pal mein ho jaavidaa.n
Meri arzoo ke hai be-karaa.n
Meri zindagi ke hai mukhtasar
Yeh jo raig-e-dasht-e-firaaq hai, yeh rukay agar

~Amjad Islam Amjad

Dasht-e-Hijraa.n Mein Na Saaya Na Sada

Dasht-e-hijraa.n mein na saaya na sada teray baad
Kitnay tanha hain teray aabla-pa teray baad

Koi peghaam na dildaar-e-nava teray baad
Khaak uraati hui guzri hai saba teray baad

Lab pe ik harf-e-talab tha na raha teray baad
Dil mein taaseer ki khahish na dua teray baad

Aks-o-aaina mein ab rabt ho kiya teray baad
Hum to phirtay hain khud apnay se khafa teray baad

Dhoop aariz ki na zulfon ki ghata teray baad
Hijr ki rut hai keh habs ki fiza teray baad

Liye phirti hai sar-e-koo-e-jafa teray baad
Parcham-e-tar garebaa.n ko hava teray baad

Perahan apna na salamat na qaba teray baad
Bus vahi hum hain vahi sehra ki rida teray baad

Nikhat-o-ney hai na dast-e-qaza teray baad
Shaakh-e-jaa.n per koi ghuncha na khila teray baad

Dil na mehtaab se ujla na jala teray baad
Aik jugnu tha chup chaap bujha teray baad

Dard seenay mein hua nauha-sara teray baad
Dil ki dharkan hai ke maatam ki sada teray baad

Kaun se rango.n ke bhanvar kesi hina teray baad
Apna khoon meri hatheli pe saja teray baad

Tujh se bichra to murjha ke hava-burd hua
Kaun deta mujhay khilnay ki dua teray baad

Aik hum hain ke be barg-o-nava teray baad
Varna aabaad hai sab khalq-e-Khuda teray baad

Aik qayaamat ki kharaashain meray chehray pe sajeen
Aik mehshar meray andar se utha teray baad

Aye falak-e-naaz meri khaak nishaani teri
Main ne matti pe tera naam likha teray baad

Tu ke simta to rag-e-jaa.n ki hadon mein simta
Main ke bikhra to sameta na gaya teray baad

Ye alag baat hai ke afshaa.n na hua tu varna
Main ne kitna tujhay mehsoos kiya teray baad

Milnay vaalay kayee mafhoom pehen ker aaye
Koi chehra bhi na aankhon ne parha teray baad

Bujhay jaatay hain khad-o-khaal manaazir afaq
Phelta jaata hai khaahish ka khala teray baad

Meri dukhti hui aankhon se gavaahi lena
Main ne socha tujhay apnay se siva teray baad

Seh liya dil ne teray baad malaamat ka azaab
Varna chubhti hai rag-e-jaa.n mein hava teray baad

Jaan-e-Mohsin mera haasil yehi mubham satrain
Sher kehnay ka hunar bhool gaya teray baad

~Mohsin Naqvi

Hum Vo Bedard Hain

Hum vo bedard hain
Khaab ganva ker bhi jinhain neend aa jaati hai
Soch soch kar bhi jin ke zehnon ko kuch nahin hota
Toot phoot ker bhi jin ke dil dharakna yaad rakhtay hain
Hum vo bedard hain
Keh jin ke aansu
Aankhon ka rasta bhool jaatay hain
Toot ker ronay ki koshish main jo
Baat bebaat muskuraatay hain
Shaam se pehlay mar jaanay ki khaahish main jo
Jeetay hain aur
Jeetay he chalay jaatay hain

~Unknown

Na Ganvaao Naavak-e-Neem Kash

Na ganvaao naavak-e-neem kash, dil-e-reza reza ganva diya
Jo bachay hain sang samet lo, tan-e-daagh daagh luta diya

Meray chaaragar ko naveed ho, saf-e-dushmanaa.n ko khabar karo
Vo jo qarz rakhtay thay jaan per, vo hisaab aaj chuka diya

Karo kaj jabee.n per sar-e-kafan, meray qaatilon ko gumaa.n na ho
Keh ghuroor-e-ishq ka baankpan, pas-e-marg hum ne bhula diya

Udher aik harf ki kushtani, idher laakh uzr thay guftani
Jo kaha to sun ke ura diya, jo likha to parh ke mita diya

Jo rukay to koh-e-giraan thay hum jo chalay to jaa.n se guzar gaye
Rah-e-yaar hum ne qadam qadam, tujhay yaadgaar bana diya

~Faiz Ahmed Faiz

Din Raat Barasta Ho Jo Baadal Nahin Dekha

Din raat barasta ho jo baadal nahin dekha
Aankhon ki tarah koi bhi baadal nahin dekha

Kiyoon log yahaan detay hain rishton ki duhaayee
Is paer se hum ne to kabhi phal nahin dekha
Paer = darakht = tree

Insaan darindon ki tarah ghoom rahay hain
Shehron ki tarha koi bhi jungle nahin dekha

Tum ne meri aankhon ke qaseeday to likkhay hain
Lekin mera behta hua kaajal nahin dekha

Us ne bhi kabhi neend se rishta nahin rakkha
Main ne bhi koi khaab mukammal nahin dekha

~Anjum Rehber

Main Bhi Hoon

Main bhi hoon matti ka putla
Main bhi ik dil rakhta hoon
Vo dil jo chaaha karta hai
Vo dil jo chaahay jaanay ki
Maasoom si khaahish rakhta hai
Vo dil jo kuch kuch paagal hai
Gheron ke dukh per kurhta hai
Apnon ke nishtar sehta hai
Aur phir bhi dharakta rehta hai
Jab aksar aisa hota hai
Dil bhi koi khaahish karta hai
Is khaahish main aur hasrat main
Koi deevaar nahin hoti
Aur lamha bhar main vo khahish
Hasrat main badal bhi jaati hai
Dil phir bhi dharakta rehta hai
Ab to mujh ko yeh lagta hai
Mera dil matti main reh ker
Khud mitti hota jaata hai
Aur ik din aisa aaye ga
Hasrat ki chataanon ke neechay
Dil ik din kuchla jaaye ga
Kiya us din koi roye ga
Marqad per meray aaye ga

~Sky Bolt

Main Ne Is Taur Se Chaaha Tujhay Aksar Jaanaan

Main ne is taur se chaaha tujhay aksar jaanaan

Jesay mehtaab ko be-ant samandar chaahay
Jesay sooraj ki kiran seep ke dil main utray
Jesay khushbu ko hava rang se hut ker chaahay
Jesay ghunchay khilay mausam se hina maangtay hain
Jesay khaabon main kheyaalon ki kamaa.n toot.ti hai
Jesay baarish ki dua aabla-pa maangtay hain

Mera her khaab meray such ki gavaahi de ga
Vus'at-e-deed ne tujh se teri khaahish ki hai
Meri sochon main kabhi dekh saraapa apna
Main ne duniya se alag teri parastish ki hai

Khahish e deed ka mosam kabhi dhundla jo hua
Noch dali hain zamano'n ki naqabain main nay
Teri palkon pe utarti hui subho'n kay liay
Torr dali hain sitaaro ki tanabain main nay

Main nay chaha k teray husn ki gulnar fiza
Meri ghazlon ki qataron se dehekti jaay
Main nay chaha k meray dil kay gulista'n ki bahar
Teri ankhon k gulabo'n se mehekti jaay

Tay to yeh tha k sajata rahay lafzon k kanwal
Meray khamosh khayalon main takallum tera
Raqs karta rahay, phirta rahay khushbu ka khumar
Meri khwahish k jazeeron main tabassum tera

Tu magar ajnabi mahol ki parwar-deh kiran
Meri bujhti hui raaton ko sahar kar na saki
Teri sanso'n main masihaai thi laikin tu bhi
Chara e zakhm e gham e deeda e tar kar na saki

Tujh ko ehsas hi kab hay k kisi dard ka daagh
Aankh say dil main utar jaay to kia hota hay
Tu k seemab tabeat hay tujhay kia maloom
Mausam e hijr theher jaay to kia hota hay

Tu nay us morr pay torra hay taaluq k jahan
Dekh sakta nahi koi bhi palat kar janaa'n
Ab ye aalam hay k ankhain jo khulain gi apni
Yaad aay ga teri deed ka manzar janaa'n

Mujh se mangay ga teray ehd e mohabbat ka hisab
Teray hijraan ka dehekta hua mehshar janaa'n
Yoon meray dil k barabar tera gham aya hay
Jaisay sheeshay k muqabal koi pathar janaa'n

Main ne is taur se chaaha tujhay aksar jaanaan

~Mohsin Naqvi

Yeh Jo Zindagi Ki Kitaab Hai

Yeh jo zindagi ki kitaab hai yeh kitaab bhi kiya kitaab hai
Kaheen ik haseen sa khaab hai kaheen jaan leva azaab hai

Kaheen aansu'on ki hai daastaa.n kaheen muskurahaton ka hai bayaa.n
Kayee chehray is main chupay huay ik ajeeb si yeh niqaab hai

Kaheen kho diya kaheen pa liye kaheen ro liya kaheen ga liya
Kaheen cheen leti hai her khushi kaheen mehrbaa.n behisaab hai

Kaheen chaaon hai kaheen dhoop hai kaheen aur he koi roop hai
Kaheen barkaton ki hain baarishain kaheen tishnagi behisaab hai

~Ramish Ropri

aksar shab-e-tanhaa'ii mein - reshmaan

Jalwa Baqadr-e-Zarf-e-Nazar Dekhtay Rahay

Jalwa baqadr-e-zarf-e-nazar dekhtay rahay
Kiya dekhtay hum un ko magar dekhtay rahay

Apna he aks pesh-e-nazar dekhtay rahay
Aaina rubaru tha jidhar dekhtay rahay

Un ki hareem-e-naaz kahaan aur hum kahaan
Naqsh-o-nigaar-e-parda-e-darr dekhtay rahay

Aisi bhi kuch firaaq ki raatain guzar gayeen
Jesay unhi ko pesh-e-nazar dekhtay rahay

Her lehza shaan-e-husn badalti rahi Jigar
Her aan hum jahaan-e-jigar dekhtay rahay

~Jigar Muradabadi

http://www.naat.co.uk/details.php?file=1054701
~Jigar's kalaam in Abida Parveen's soulful voice. I feel you owe yourself to listen to it.

Phir Aaina-e-Aalam Shayed Keh Nikhar Jaaye

Phir aaina-e-aalam shayed keh nikhar jaaye
Phir apni nazar shaayed taa hadd-e-nazar jaaye

Sehra pe lagay pehray aur qufl paray ban per
Ab sheher badar ho kar deevaana kidhar jaaye

Khaak-e-rah-e-jaanaa.n pe kuch khoo.n tha gira apna
Is fasl main mumkin hai yeh qarz utar jaaye

Dekh aayen chalo hum bhi jis bazm main suntay hain
Jo khanda-balb aaye vo khaak-basar jaaye

Ya khauf se darr guzrain ya jaa.n se guzar jaayen
Marna hai keh jeena hai ik baat theher jaaye

~Faiz Ahmed Faiz

Suna Hai Log Usay Aankh Bhar Ke Dekhtay Hain

*Aik aisay shakhs ke liye jis ki main teh-e-dil se izzat karti hoon aur be-panah mamnoon-o-mashkoor hoon

Suna hai log usay aankh bhar ke dekhtay hain
So us ke sheher main kuch din theher ke dekhtay hain

Suna hai rabt hai us ko kharaab haalon se
So apnay aap ko barbaad kar ke dekhtay hain

Suna hai dard ki gaahak hai chashm-e-naaz us ki
So hum bhi us ki gali se guzar ke dekhtay hain

Suna hai us ko bhi hai sher-o-shaairi se shaghaf
So hum bhi moejezay apnay hunar ke dekhtay hain

Suna hai bolay to baaton se phool jhartay hain
Yeh baat hai to chalo baat kar ke dekhtay hain

Suna hai raat usay chaand takta rehta hai
Sitaaray baam-e-falak se utar ke dekhtay hain

Suna hai din ko usay titliyaan sataati hain
Suna hai raat ko jugnu theher ke dekhtay hain

Suna hai us ki siyaah chashmgi qayaamat hai
So us ko surma farosh aah bhar ke dekhtay hain

Suna hai hashr hain us ki ghazaal si aankhain
Suna hai us ko hiran dasht bhar ke dekhtay hain

Suna hai aaina tamsaal hai jabee.n us ki
Jo saada dil hain usay ban sanvar ke dekhtay hain

Suna hai us ke badan ki taraash aisi hai
Keh phool apni qabaayen katar ke dekhtay hain

Suna hai us ke shabistaa.n se muttasil hai bahisht
Makee.n udher ke bhi jalvay idher ke dekhtay hain

Rukay to gardishain us ka tavvaaf karti hain
Chalay to us ko zamaanay theher ke dekhtay hain

Suna hai raat se barh kar hain kaakulain us ki
Suna hai shaam ko saaye guzar ke dekhtay hain

Suna hai us ke labon se gulaab jaltay hain
So hum bahaar pe ilzaam dhar ke dekhtay hain

Suna hai jab se hamaail hain us ki gardan main
Mizaaj aur he laal-o-gauhar ke dekhtay hain

Suna hai chashm-e-tasavvur se dasht-e-imkaa.n main
Palang zaaviye us ki kamar ke dekhtay hain

Vo sarvqad hai magar be-gul-e-muraad nahin
Keh us shajar pe shagoofay samar ke dekhtay hain

Bus ik nigaah se loota hai qaafla dil ka
So raah ravaan-e-tamanna bhi darr ke dekhtay hain

Kahaaniyaan he sahi sab mubaalghay he sahi
Agar vo khaab hai tabeer kar ke dekhtay hain

Ab us ke sheher main thehrain ke kooch kar jaayen
Faraaz aao sitaaray safar ke dekhtay hain

~Ahmed Faraz