Deyaar-e-Ghair Main Kesay Tujhay Sada Detay

Deyaar-e-ghair main kesay tujhay sada detay
Tu mil bhi jaata to tujhay ganva detay

Tumhi ne hum ko na sunaaya dukh apna
Dua vo kartay keh aasmaa.n hum hila detay

Hamain ye zom raha keh ab vo pukaarain ge
Unhain ye zidd thee keh har baar hum sada detay

Vo tera gham tha ya taaseer meray lehjay ki
Keh jis ko haal sunaatay usay rula detay

Tumhain bhulaana he avval to dastaras main nahin
Jo ikhtiyaar bhi hota to kiya bhula detay

Tumhaari yaad ne koi javaab he na diya
Meray kheyaal ke aansu rahay sada detay

Sama'ton ko main ta-umr kosta Syed
Vo kuch na kehtay magar hont to hila detay

~Wasi Shah

Ye Dil

Ye dil bhulaata he nahin hai mohabbatain us ki
Pari hui thee.n mujhay kis qadar aadatain us ki

Ye mera saara safar us ki khushbu'on main kata
Mujhay to raah dikhaati thee.n chahatain us ki

Ghiri hui hoon main chehron ki bheer main lekin
Kahin nazar nahin aatee.n shabahatain us ki

Main door honay lagi hoon to aisa lagta hai
Keh chaaon jesi thee.n mujh per rafaqatain us ki

Ye kis gali main, kis shehr main nikal aaye
Kahaan pe reh gayeen logo sadaqatain us ki

Main baarishon main juda ho gayee hoon us se magar
Ye mera dil, meri saansain, amanatain us ki

~Noshi Gilani

*aaj meri ammi ki chauthi barsi hai. Dua kijiye ga ke Khuda un ki maghfirat farma ke un ke darajaat buland farmaaye. (Ameen)

Khud-daariyon Ke Khoon Ko Arzaa.n Na Kar Sakay

Khud-daariyo.n ke khoon ko arzaa.n na kar sakay
Hum apnay jauharo.n ko numaayaa.n na kar sakay

Ho kar kharaab-e-mae teray gham to bhula diye
Lekin gham-e-hayaat ka darmaa.n na kar sakay

Tootaa talism-e-ehd-e-muhabbat kuch is tarah
Phir aarzu ki shama ferozaa.n na kar sakay

Her shay qareeb aa ke kashish apni kho gayee
Vo bhi ilaaj-e-shauq-e-gurezaa.n na kar sakay

Kis darjaa dil-shikan thay muhabbat ke haadsay
Hum zindagi main phir koi armaa.n na kar sakay

Maayoosiyo.n ne cheen liye dil ke valvalay
Vo bhi nishaat-e-rooh ka saamaa.n na kar sakay

~Sahir Ludhianvi

Dekhnay Ki To Kisay Taab Hai Magar Ab Tak

Dekhnay ki to kisay taab hai magar ab tak
Jab bhi us raah se guzro
To kisi dukh ki kasak tokti hai keh vo darvaza khula hai ab bhi
Aur us sehen main har su yoon he pehlay ki tarah
Farsh-e-nau-ummeediye deedaar bicha hai ab bhi
Aur dil kehta hai kahin aur chalay jaayen
Jahaan koi darvaza abas va ho
Aur na koi yaad fariyaad ka kashkol liye bethi ho
Mahram-e-hasrat-e-deedaar ho deevaar koi
Aur na koi saya-e-gul, hijrat-e-gul se veeraa.n ho
Yeh bhi kar dekha hai...
Yeh bhi kar dekha hai her baar magar raahon main
Des pardes ki bemahar guzargaahon main
Qaaflay qaamat-o-rukhsaar lab-o-gesu ke
Pardah-e-chashm pe yoon utray hain be-soorat-o-rang
Jis tarah band dareechon pe giray baarish-e-sang
Aur dil kehta hai her baar laut chalo
Is se pehlay ke vahaan jaayen to ye dukh bhi na ho
Vo nishaani, keh vo darvaza khula hai ab bhi
Aur us sehen main har soo yoon he pehlay ki tarah
Farsh-e-nau-ummeediye deedaar bicha hai ab bhi

~Faiz Ahmed Faiz

Teri Rehmaton Ke Deyaar Main

Teri rehmaton ke deyaar main teray baadalon ko pata nahin
Abhi aag sard nahin hui, abhi aik alaao bujha nahin
Meri bazm-e-dil to ujarr chuki, mera fars-e-jaa.n to simat chuka
Sabhi jaa chukay meri hamnashee.n magar aik shakhs gaya nahin
Dar-o-baam sab ne saja liye, sabhi raushni main naha liye
Meri ungliyaa.n bhi jhulas gayeen magar aik chiraagh jala nahin
Gham-e-zindagi! teri raah main shab-e-aarzu teri chaah main
Jo ujarr gaya vo basa nahin, jo bicharr gaya vo mila nahin
Jo dil-o-nazar ka suroor tha meray paas reh ke bhi door tha
Vahi aik gulaab ummeed ka meri shokh-e-jaa.n pe khila nahin
Pas-e-karvaa.n sar-e-rahguzar main shikasta paa hoon is liye
Keh qadam to sab se mila liye mera dil kisi se mila nahin
Mira hamsafar jo ajeeb hai to ajeeb tar hoon main aap bhi
Mujhay manzilon ki khabar nahin usay raaston ka pata nahin

~Unknown

Faqeer Ban Kar

Faqeer ban kar tum un ke dar par hazaar dhooni rama ke betho
Jabee.n ke likhay ga kiya karo ge, jabee.n ka likha mita ke dekho

Aye un ki mehfil main aanay vaalo, aye sood-o-sauda bataanay vaalo
Jo un ki mehfil main aa ke betho, to saari duniya bhula ke betho

Bohot jataatay ho chaah hum se, magar karo ge nibaah hum se?
Zara milaao nigaah hum se, hamaaray pehlu main aa ke betho

Junoo.n puraana hai aashiqon ka, jo yeh bahaana hai aashiqon ka
To ik thikaana hai aashiqon ka, huzoor jungle main jaa ke betho

Hamain dikhaao na zard chehra, liye yeh vehshat ki gard chehra
Rahay ga tasveer-e-dard chehra, jo rog aisay laga ke betho

Janaab-e-Insha yeh aashiqi hai, janaab-e-Insha yeh zindagi hai
Janaab-e-Insha jo hai yehi hai, na is se daaman chura ke betho

~Ibn-e-Insha

Tum Door Thay To Kiya Hua

Tum door thay to kiya hua
Tum mil gaye to kiya hua
Veeraaniyaan kam na huiin
Tanha tha main, tanha raha
Ik aas thee tum aao ge
To zindagi mil jaaye gee
Ik baar dekho ge idhar
To raushni mil jaaye gee
Jab aa gaye to kiya hua
Aankhain meri jalti raheen
Aur dil mera bujhta gaya
Tum door thay to kiya hua
Tum mil gaye to kiya hua
Ye to koi milna nahin
Keh faaslay hon darmiyaan
Khaamoshiyaan donon taraf
Tanhaaiyyaan donon taraf
Go raasta to aik hai
Per hamsafar hon ajnabi
To kis baat ka milna hua?

~Unknown, also a song by Vital Signs

What was the big deal when we were apart?
What is so great when we got together?
The silence remained...
I was alone before you came, I remained lonely even after you came.
I thought things would get lively with your arrival (in my life)...
I thought when you'd look at me, there would be light everywhere...
But when you came, my eyes kept stinging (the same feeling when you've cried for a long while)
My heart kept dying
What was the big deal when we were apart?
What is so great when we got together?
This is no union,
That there remain distances and silence between two people.
What's the point of a union when even though you're walking the same path, your partner is a stranger to you?!

Aa Keh Vabesta Hain Us Husn Ki Yaadain Tujh Se...

Aa keh vabesta hain us husn ki yaadain tujh se
Jis ne is dil ko pari-khaana bana rakkha tha
Jis ki ulfat main bhula rakkhi thee duniya hum ne
Der ko dehr ka fasana bana rakkha tha
Aashna hain teray qadmon se vo raahain jin per
Us ki madhosh javani ne enayat ki hai
Karvaa.n guzray hain jis se usi ra'anayee ke
Jis ki in aankhon ne be-sood ibadat ki hai
Tujh se kheli hain vo mehboob havaayen jin main
Us ke malboos ki afsurdah mehek baaqi hai
Tujh per bhi barsa hai us baam se mehtaab ka noor
Jis main beeti hui raaton ki kasak baaqi hai
Tu ne dekhi hai vo peshaani, vo rukhsaar, vo hont
Zindagi jin ke tasavvur main ganva di hum ne
Tujh pe uthi hain vo khoyee hui saahir aankhain
Tujh ko maloom hai kiyoon umr ganva di hum ne
Hum pe mushtarka hain ehsaan gham-e-ulfat ke
Itnay ehsaan keh ginvaaoon to ginva na sakoon
Hum ne is ishq main kiya khoya hai kiya seekha hai,
Juz teray kisi aur ko samjhaaoon to samjha na sakoon

~Faiz Ahmad Faiz

Dil Main Kitnay Ehd Baandhay Thay Bhulaanay Ke Usay

Dil main kitnay ehd baandhay thay bhulaanay ke usay
Vo mila to sab iraaday torna accha laga

Be-iraada lams ki vo sansani piyari lagi
Kam tavajjo aankh ka vo dekhna accha laga

Neem shab ki khaamoshi main bheegti sarkon pe kal
Teri yaadon ke jalo main ghoomna accha laga

Us uduay-e-jaa.n ko Amjad main bura kesay kahoon
Jab bhi aaya saamnay vo bevafa accha laga

~Amjad Islam Amjad

Marg-e-Soz-e-Mohabbat

Phir oat le ke daaman-e-abr-e-bahaar ki
Dil ko manaayen hum, kabhi aansu bahaayen hum
Suljhaayen be-dili se ye uljhay huay savaal
Vaa.n jaayen ya na jaayen, na jaayen keh jaayen hum

Phir dil ko paas-e-zabt ki talqeen kar chukay
Aur imtihaan-e-zabt se phir jee churaayen hum
Aao keh aaj khatm hui daastaan-e-ishq
Ab khatm-e-aashqi ke fasaanay sunaayen hum

~Faiz Ahmed Faiz

Yu.nhi Besabab Na Phira Karo...

Yu.nhi besabab na phira karo, koi shaam ghar bhi raha karo
Vo ghazal ki sacchi kitaab hai, usay chupkay chupkay parha karo

Abhi raah main kayee mor hain koi aaye ga koi jaaye ga
Tumhain jis ne dil se bhula diya usay bhoolnay ki dua karo

Mujhay ishtihaar si lagti hain ye muhabbaton ki kahaaniyaan
Jo kaha nahin vo suna karo, jo suna nahin vo kaha karo

Ye khizaan ki zard si shaam main, jo udaas per ke paas hai
Ye tumharay ghar ki bahaar hai, isay aansu.on se hara karo
(per = darakht = tree)

Koi haath bhi na milaaye ga jo galay milo ge tapaak se
Ye naye mizaaj ka shehr hai, zara faaslay se mila karo

~Bashir Badr

Mujh Se Pehli Si Muhabbat Meray Mehboob Na Maang

Mujh se pehli si muhabbat meray mehboob na maang
Main ne samjha tha keh tu hai to darakhshaa.n hai hayaat
Tera gham hai to gham-e-dehar ka jhagra kiya hai
Teri soorat se hai aalam main bahaaron ko sabaat
Teri aankhon ke siva duniya main rakkha kiya hai
Tu jo mil jaaye to taqdeer nigoo.n ho jaaye
Yoon na tha main ne faqat chaaha tha yoon ho jaaye
Aur bhi dukh hain zamanay main muhabbat ke siva
Raahatain aur bhi hain vasl ki rahat ke siva
Mujh se pehli si muhabbat meray mehboob na maang

An-ginat sadiyon ke taareek baheemana tilism
Resham-o-atlas-o-kamkhwaab main bunvaaye huay
Jaabaja biktay huay koocha-o-bazaar main jism
Khaak main lithray huay khoon main nehlaaye huay
Jism nikaalay huay amraaz ke tanooro.n se
Peep behti hui galtay huay naasooro.n se
Laut jaati hai udher ko bhi nazar kiya kiijay
Ab bhi dilkash hai tera husn magar kiya kiijay
Aur bhi dukh hain zamanay main muhabbat ke siva
Raahatain aur bhi hain vasl ki rahat ke siva
Mujh se pehli si muhabbat meray mehboob na maang

~Faiz Ahmed Faiz

Kabhi Kabhi Meray Dil Main Kheyaal Aata Hai...

Kabhi kabhi meray dil main kheyaal aata hai

Keh zindagi teri zulfo.n ki narm chaao.n main
Guzarnay paati to shadaab ho bhi sakti thee
Ye teergi jo meri zeest ka muqaddar hai
Teri nazr ki shuaao.n main kho bhi sakti thee

Ajab na tha keh main begaana-e-aalam ho ker
Teray jamaal ki ra'naaiyyon main kho rehta
Tera gudaaz badan, teri neembaar aankhain
Inhi haseen fasaano.n main mehev rehta

Pukaartee.n mujhay jab tilkhiyaa.n zamanay ki
Teray labon se halavat ke ghoont pee leta
Hayaat cheekhti phirti birhna-sar aur main
Ghaneri zulfo.n ke saaye main chup ke jee leta

Magar ye ho na saka aur ab ye aalam hai
Keh tu nahin, tera gham, teri justuju bhi nahin
Guzar rahi hai kuch is tarah zindagi jesay
Isay kisi ke sahaaray ki aarzu bhi nahin

Zamaanay bhar ke dukhon ko laga chuka hoon galay
Guzar raha hoon kuch anjaani guzargaaho.n se
Muheeb saaye meri simt barhtay aatay hain
Hayaat-o-maut ke pur-haul khaarah-zaaron se

Na koi jaada, na koi manzil, na roshni ka suraagh
Bhatak rahi hai khalaao.n main zindagi meri
Inhi khalaao.n main reh jaaoo.n ga kahee.n kho ker
Main jaanta hoon meri hum-nafs magar yoonhi

Kabhi kabhi meray dil main kheyaal aata hai...

~Sahir Ludhianvi

Chalo Ik Baar Phir Se Ajnabi Ban jaayen Hum Donon

Chalo ik baar phir se ajnabi ban jaayen hum donon

Na main tum se koi ummeed rakkhoon dil-navazi ki
Na tum meri taraf dekho ghalat andaaz nazron se
Na meray dil ki dharkan larkharaaye meri baaton main
Na zahir ho tumhari kashmakash ka raaz nazron se

Ta'aruf rog ho jaaye to us ko bhoolna behtar
Ta'alluq bojh ban jaaye to us ko torna accha
Vo afsana jisay takmeel tak lana na ho mumkin
Usay aik khoobsoorat mor de ker chorna accha

Chalo ik baar phir se ajnabi ban jaayen hum donon

~Sahir Ludhianvi

Jo Utar Ke Zeena-e-Shaam se...

One of my MOST favorites...

Jo utar ke zeena-e-shaam se teri chashm-e-khush main sama gaye
Vahi jaltay bujhtay se mehr-o-maah meray baam-o-darr ko saja gaye

Ye ajeeb khel hai ishq ka main ne aap dekha ye mo'jza
Vo jo lafz meray guma.n main thay vo teri zuba.n per aa gaye

Vo jo geet tum ne suna nahin meri umr bhar ka riyaz tha
Meray dard ki thee dastaa.n jisay tum hansi main ura gaye

Vo chiragh-e-jaa.n kabhi jis ki lau na kisi hava se nigoo.n huii
Teri be-vafayee ke vasvasay usay chupkay chupkay bujha gaye

Vo tha chaand shaam-e-vasaal ka keh tha roop teray jamaal ka
Meri rooh se meri aankh tak kisi roshni main naha gaye

Ye jo bandgaan-e-neyaaz hai ye tamaam hai vo lashkari
Jinhain zindagi ne amaa.n na dee to teray huzoor main aa gaye

Teri berukhi ke deyaar main main hava ke saath hava hua
Teray aainay ki talaash main meray khaab chehra ga.nva gaye

Teray vasvaso.n ke fishaar main tera sharaar-e-rang ujarr gaya
Meri khaahisho.n ke ghubaar main meray maah-o-saal-e-vafa gaye

Vo ajeeb phool se lafz thay teray hont jin se mehek uthay
Meray dasht-e-khaab main door tak koi baagh jesay laga gaye

Meri umr se na simat sakay meray dil main itnay savaal thay
Teray paas jitnay javab thay teri ik nigaah main aa gaye
(This is one my absolute favorite shers)

~Amjad Islam Amjad

Naye Kapray Badal Ker Jaaoon Kahaan...

Naye kapray badal ker jaaoon kahaan aur baal banaoon kis ke liye
Vo shakhs to shehr he chor gaya ab khaak uraaoon kis ke liye

Jis dhoop ki dil ko thandak thee vo dhoop usi k saath gayee
In jalti bujhti galiyon main ab khaak uraaoon kis ke liye

Vo shehr main tha to us ke liye auron se milna parta tha
Ab aisay vesay logon ke main naaz uthaaoon kis ke liye

Ab shehr main us ka badl he nahin koi vesa jaan-e-ghazal he nahin
Aivaan-e-ghazal main lafzon ke guldaan sajaoon kis k liye

Muddat se koi aaya na gaya sunsaan pari hai ghar ki fiza
In khaali kamron main Nasir ab shama jalaaoon kis ke liye

~Nasir Kazmi

Faaslay

Faaslay aisay bhi hon ge ye kabhi socha na tha
Saamnay betha tha meray aur vo mera na tha

Vo keh khushbu ki tarah phela tha meray chaar su
Main usay mehsoos kar sakta tha chu sakta na tha

Raat bhar us ki he aahat kaan main aati rahi
Jhaank ker dekha gali main koii bhi aaya na tha

Aks to maujood thay per aks tanhaayee ke thay
Aaiina to tha magar us main tera chehra na tha

Aaj us ne dard bhi apnay alehda kar diye
Aaj main roya to meray saath vo roya na tha

Ye sabhi veeraaniyaan us ke juda honay say theen
Aankh dhundlaayee huii thee shehr dhundlaya na tha

Yaad kar ke aur bhi takleef hoti thee Adeem
Bhool jaanay k siva ab koii bhi chaara na tha

~Adeem Hashmi

Sher

Vo khaab tha bikhar gaya, kheyal tha mila nahin
Magar dil ko kiya hua, ye kiyoon bujha, pata nahin
Her aik din udas din, tamam shab udasiyan
Kisi se kiya bicharr gaye keh jesay kuch bacha nahin

Kuch Aisay Ghaao Bhi Hotay Hain

Kuch aisay ghaao bhi hotay hain
Jinhain zakhmi aap nahin dhotay
Bin roye huay aansoo ki tarah
Seenay main chupa ke rakhtay hain
Aur saari umr nahin rotay
Neendain bhi muhaiiyya hoti hain
Sapnay bhi door nahin hotay
Kiyoon phir bhi jaagtay rehtay hain
Kiyoon saari raat nahin sotay
Ab kis se kahain aye jaan-e-vafa
Ye ahl-e-vafa kis aag main jaltay rehtay hain
Kiyoon bujh ker raakh nahin hotay

~Amjad Islam Amjad

Kiya Mila Mohabbat Se

Khaab ki musafat se
Vasl ki tamazat se
Roz-o-shab reyazat se
Kiya mila mohabbat se
Aik hijr ka sehra
Aik shaam yaadon ki
Aik thaka hua aansoo

~ Khalilullah Farooqui

Yaadon ki Zanjeer

Vo makaa.n jis ke dareechay
Meri aahat he se khul jaatay thay
Jis ke be-khaab dar-o-baam
Sada mera liye chashm-barah rehtay thay
Ab hai khandar ki soorat
Khirkiyaan band hain
Darvaazay muqqaffil hain
Najanay kab se
Unhi rasto.n pe magar
Meray maanoos qadam
Ab bhi besaakhta uth jaatay hain
Dastakain de ke palat aata hoon

~Farigh Bukhari

Hum Log Na Thay Aisay

Hum log na thay aisay
Hain jesay nazar aatay
Aye vaqt gavahi de
Hum log na thay aisay
Ye shehr na tha aisa
Ye rog na thay aisay
Deevaar na thay rishtay
Zindaan na thee basti
Khaljaan na thee hasti
Yoon maut na thee sasti
Ye aaj jo soorat hai
Halaat na thay aisay
Yoon ghair na thay mausam
Din raat na thay aisay
Tafreeq na thee aisi
Sanjog na thay aisay
Aye vaqt gavahi de
Hum log na thay aisay

~ Amjad Islam Amjad

Aakhri Baat

Tuluu-e-shams-e-mufaarqat hai
Puraani kirnain naye makaanon ke aanganon main laraz rahi hain
Faseel-e-shehr-e-vafa ke rauzan chamaktay zarron se bhar gayee hain
Gaye dinon ki azeez baatain, nigaar subhain, gulaab raatain
Bisaat-e-dil bhi ajeeb shaye hai, hazaar jeetain, hazaar maatain
Judaaiyyon ki havaayen, lamhon ki khushk matti ura raheen hain
Gayee ruton ka malaal kab tak
Chalo ke shaakhain to toot.ti hain
Chalo ke qabron pe khoon ronay se
Apni aankhain he phoot.ti hain
Yeh mor vo hai jahaa.n se meray tumhaaray rastay badal gaye hain
Puraani raahon ko lautna bhi hamari taqdeer main nahin
Keh raastay bhi hamaaray qadmon ke saath aagay nikal gaye hain

Tuluu-e-shams-e-mufaarqat hai
Tum apni aankhon main jhilmilaatay huay sitaaron ko maut de do
Gayee ruton ke tamaam phoolon tamaam khaaron ko maut de do
Naye safar ko hayaat bakhsho
Keh pichli raahon pe sabt jitnay nuqoosh-e-paa hai
Vo baar hon ge
Hava uraaye keh tum uraao

~Amjad Islam Amjad

Introduction

I love Urdu poetry and thought I'd share some of my collection of Urdu poetry with others. Enjoy!